Nubwo atari yasohotse ku rutonde rw’Amavubi ruherutse guhamagarwa, Rutahizamu Ani Elijah ukomoka mu gihugu cya Nigeria ari mu bakinnyi bitabiriye umwiherero w’Amavubi kuri uyu wa 20 Gicurasi 2024, ariko ntiyahatinze yahise yongera asubizwa mu rugo.
Ikipe y’igihugihugu [Amavubi], kuri uyu wa mbere yatangiye umwiherero, umutoza Frank Spittler Torsten akaba yatangiranye n’abakinnyi bakina imbere mu Gihugu.
Mu mafoto y’abakinnyi bawitabiriye hagaragayemo Rutahizamu wa Bugesera FC, Umunya-Nigeria Ani Elijah utari uri ku rutonde umutoza yahamagaye. Bivuze ko na we yitabiriye umwiherero.
Nyuma y’akanya gato bimenyekanye ko yajyanye n’abandi bakinnyi mu mwiherero, hasohotse amakuru yemeza ko uyu rutahizamu yamaze gukurwa muri uwo mwiherero.
Ani Elijah yakuwe mu mwiherero w’Ikipe y’Igihugu ’Amavubi’ kugira ngo abanze gushakirwa ibyangombwa byo kuba yakinira u Rwanda.
Uyu mukinnyi ntiyari yatangajwe ku rutonde rw’abahamagawe n’Umutoza Frank Spittler Torsten, ariko ku giti cye abwirwa ko azitabira umwiherero.
Amakuru avuga ko FERWAFA yabajije mu Ishyirahamwe ry’Umupira w’Amaguru muri Nigeria niba hari ikipe y’igihugu cyabo yakiniye, ibwirwa ko ntayo ndetse kuri ubu itegereje ko FIFA yamwemeza nk’umukinnyi wakinira u Rwanda, ubundi agasubira mu mwiherero.
Kugeza ubu hategerejwe ko uyu musore abona ibyangombwa maze akobona gusubira mu mwiherero w’Ikipe y’Igihugu Amavubi urimbanije.
Ani Elijah, asoje Shampiyona ya 2023-2024 ayoboye urutonde rw’abatsinze ibitego byinshi. Aba anganya na mugenzi we Victor Mbaoma ukinira APR FC ibitego 15.
About The Author
