Umutoza w’umunya-Argentine Mauricio Pochettino wanyuze mu makipe nka Tottenham Hotspur, Chelsea na Paris Saint Germain yemeye kuba umutoza mukuru w’ikipe y’igihugu ya Leta Zunze Ubumwe z’Amerika.
Pochettino akaba ariwe uzajyana n’ikipe y’igihugu ya Leta Zunze Ubumwe z’Amerika mu gikombe cy’isi kizaba muri 2026, iki gikombe kikaba kizabera muri Leta Zunze Ubumwe z’Amerika, Canada na Mexico.
Uyu akaba ari umwanya azajyaho asimbuye Gregg Berhalter wirukanwe nyuma ya Copa America yabaye muri Nyakanga 2024.
Byatangiye Leta Zunze Ubumwe z’Amerika zifuza Jurgen Klopp nk’umutoza mukuru ariko ntiyabyemera, gusa ubwo Pochettino yegerwaga ntiyigeze ashidikanya mu gufata iyo mirimo.
Biteganyijwe ko Pochettino azatoza umukino we wa mbere tariki 7 Nzeri 2024, ni umukino uzabera Kansas ukazahuza Leta Zunze Ubumwe z’Amerika na Canada.
Pochettino w’imyaka 52 yatoje amakipe arimo Espanyol, Southampton, Tottenham Hotspur, Paris Saint Germain na Chelsea aheruka gutoza.
Leta Zunze Ubumwe z’Amerika niyo kipe ya mbere y’igihugu Pochettino agiye gutoza.
About The Author
