Ikipe y’Igihugu y’umupira w’amaguru y’u Rwanda “Amavubi” yazamutseho umwanya umwe ku rutonde ngaruka kwezi rwa FIFA nyuma yo kunganya na Nigeria mu mikino yo gushaka itike y’imikino ya nyuma mu gikombe Ny’Afurika.
U Rwanda rwari rusanzwe ruri ku mwanya wa 131, rukaba rwazamutseho umwanya umwe rujya ku mwanya wa 130 ku rutonde rw’Impuza-shyirahamwe y’umupira w’Amaguru ku Isi (FIFA) rwasohotse kuri uyu wa Kane tariki ya 19 Nzeri 2024.
FIFA igaragaza ko urutonde rw’uku kwezi habayemo impinduka ku bihugu 10 bya mbere ku Isi ugereranyije n’ukwezi kwa Nyakanga.
Ni urutonde ruyobowe na Argentine ikurikiwe n’u Bufaransa, Espagne, u Bwongereza, Brazil, u Bubiligi, u Buholandi, Portugal, Colombia n’u Butaliyani.
Ibihugu 10 bya mbere muri Afurika ni Maroc (ya 14), Sénégal (21), Misiri (31), Côte d’Ivoire (33), Tunisia (36) Nigeria (39), Algeria (41), Cameroun (53), Mali (54), Repubulika Iharanira Demokarasi ya Congo (58).
Mu bihugu bituranye n’u Rwanda, Repubulika Iharanira Demokarasi ya Congo ni iya 58, Uganda (90), Kenya (102), Tanzania (110) n’u Burundi (136).
Amavubi aheruka gukina muri uku kwezi kwa Nzeri mu gushaka itike y’igikombe cy’Afurika cya 2025 aho yangayije na Libya (1-1) ndetse na Nigeria (0-0).
Ibi bihugu byombi biri kumwe mu itsinda rya kane ryo gushaka itike y’Igikombe cya Afurika, rukaba runayoboye itsinda C ryo gushaka itike y’Igikombe cy’Isi cya 2026.
About The Author
