Visi Perezida wa Kenya, Rigathi Gachagua yatanze ikirego mu rukiko rukuru i Nairobi asaba guhagarika ibirego ashinjwa n’Abadepite bigamije kumweguza mu ntangiriro z’iki cyumweru.
Ashinjwa n’Abadepite ibirego birimo; kubiba urwango rushingiye ku moko, gutesha agaciro Guverinoma iyobowe na Perezida Ruto, kutubahiriza amabwiriza no kwitwara nabi mu buryo bukabije.
Gachagua kandi ahakana yeruye ibyo abambari ba Perezida William Ruto bamushinja bivuga ko yari inyuma y’imyigaragambyo ikaze yarwanyaga Leta yabaye muri uyu mwaka.
Yagaragaje ko kumurega bishingiye ku binyoma
Ibiro Ntaramakuru by’Abongereza byatangaje ko kuva Perezida Ruto yasesa Guverinoma nyuma y’imyigaragambyo yabaye muri Kamena na Nyakanga, yahise ashyiraho Guverinoma yiganjemo abo mu ishyaka ritavuga rumwe n’ubutegetsi.
Bivugwa ko kuva icyo gihe Gachagua atongeye kugira ijambo ndetse nyuma yaje gukurwa ku rubuga rwa whatsApp yari ahuriyeho na Perezida Ruto kandi ari ho yamenyeraga gahunda y’Umukuru w’Igihugu nkuko yabitangarije Ikinyamakuru The Citizens.
Iyo myigaragambyo bivugwa ko Gachagua yari inyuma yakozwe n’abiganjemo urubyiruko yabereye mu Nteko Ishinga Amategeko y’iki gihugu no mu mihanda yo mu mujyi i Nairobi, yamaganaga izamuka ry’imisoro yasize ihitanye abantu 50, abandi barakomereka.
Muri raporo iheruste gushyirwa hanze n’Umuryango Mpuzamahanga uharanira uburenganzira bwa muntu, Amnesty International, watangaje ko muri Kanama abantu bari bambaye imyenda ya polisi ariko itariho ibirango ari bo barashe amasasu menshi abigaragambirizaga mu Nteko Ishinga Amategeko ya Kenya iri i Nairobi.
Mu cyumweru gishize ni bwo Abadepite mu Nteko Ishinga Amategeko batangiye urugamba rwo kweguza Visi Perezida Rigathi Gachagua, bamushinja kudakora inshingano yatorewe uko bikwiye.
Ku ikubitiro, Abadepite bakabakaba 250 muri 349 bemeje ubusabe bwo kweguza Gachagua bahita banaha Depite Didmus Barasa inshingano zo gukurikirana iby’iyo dosiye.
Perezida Ruto yahisemo Gachagua kumubera visi perezida we mu 2022 ndetse mu minsi yatambutse Gachagua yasabye Perezida kutazemera ko yeguzwa, amwibutsa isezerano bagiranye ubwo bajyaga ku butegetsi avuga ko atazigera yemera ko Gachagua asuzugurwa.
About The Author
