Umutwe wa Hezbollah wabonye umuyobozi mushya witwa Naïm Qassem akaba asimbuye Hassan Nasrallah, wari umuyobozi wa Hezbollah akaba yarapfuye mu kwezi kwa Nzeri 2024 aguye mu bitero Israel yagabye muri Liban.
Umutwe wa Hezbollah, kuri uyu wa Kabiri tariki 29 Ukwakira 2024, watangaje ko watoye Naïm Qassem, wari usanzwe ari nomero ya kabiri mu buyobozi bwa Hezbollah, kugira ngo asimbure Hassan Nasrallah.
Itangazo ryasohowe na Hezbollah ryavuze ko Inama njyanama ya ‘Choura’ nk’urwego ruyobora umutwe wa Hezbollah, yashyizeho Sheikh Naïm Qassem, nk’Umuyobozi mukuru wa Hezbollah”.
Naïm Qassem asimbuye Hassan Nasrallah wapfuye tariki 27 Nzeri 2024 mu bitero bikomeye byagabwe na Israel mu Majyepfo ya Beirut. Ni mu gihe kugeza n’ubu Israel ikiri mu ntambara n’umutwe wa Hezbollah.
Hachem Safieddine, wahabwaga amahirwe yo kuba ari we ushobora kuzasimbura Hassan Nasrallah ku buyobozi bwa Hezbollah, na we aherutse kugwa mu bitero by’ingabo za Israel, kuko urupfu rwe rwemejwe n’umutwe wa Hezbollah mu cyumweru gishize, ndetse n’abandi bayobozi batandukanye bo mu mutwe wa Hezbollah.
Naïm Qassem, ufite imyaka 71 y’amavuko, ni umwe mu bashinze umutwe wa Hezbollah mu 1982, mu mwaka wa 1991, aba umunyamabanga mukuru wungirije w’uwo mutwe wa Hezbollah.
Ikinyamakuru CNews cyatangaje ko uwo muyobozi mushya wa Hezbollah, ari umuntu uvugwaho kuba akanganye, ateye impungenge, mbese akunda gushotorana (Un successeur menaçant).
Yagaragaye kuri televiziyo inshuro eshatu gusa kuva Hassan Nasrallah yakwicwa. Inshuro ya nyuma yagaragaye hakaba ari ku itariki 15 Ukwakira 2024.
About The Author
