Polisi yo muri Kenya iri guhangana n’abigaragambya bamagana ko hari abantu baburiwe irengero biganjemo abakoresha imbuga nkoranyambaga. Abigaragambya bavuga ko Polisi ari yo yabashimuse nyuma yo gukora amashusho atarashimishije Perezida William Ruto.
Mu mijyi ya Kenya cyane cyane mu Murwa mukuru, Nairobi, hazindukiye imyigaragambyo y’abantu bamagana iryo shimutwa, bakavuga ko abo bantu bafunzwe mu buryo budakurikije amategeko.
Mbere y’iyo myigaragambyo, hari habanje gukorwa ihuriro ry’abanyamategeko bo muri Kenya, bamagana icyo kintu.
Ubuyobozi bwa Kenya bwo bwemeza ko nta muntu ufungwa mu buryo budakurikije amategeko, ko Leta idashobora gukorera abaturage bayo ibintu nk’ibyo.
Abigarambya bahisemo kwicara mu mihanda iri rwagati muri Nairobi mu rwego rwo gusaba ko abo bantu barekurwa.
Reuters yatangaje ko nta gisubizo yahawe ubwo yabazaga Umuvugizi wa Polisi ya Kenya icyo avuga kubyo urwego avugira rushinjwa.
Kwigaragambya kuvugwa muri Kenya muri iyi minsi ya nyuma y’umwaka wa 2024 kuje gukurikira ukundi gukomeye kurushaho kwabaye muri iki gihugu muri Kamena, 2024.
Bigitangira yari imyigaragambyo igamije kwamagana ibyitwaga imisoro idakwiye, ariko byaje kwaguka, bihinduka ikintu gikomeye cyatumye hirya no hino muri iki gihugu abantu bahaguruka barigaragambya, batwika inzu, amaduka, imipine, bamwe bararaswa barapfa abandi barakomereka.
Nubwo byaje guhagarikwa, ariko uwahoze ari Visi Perezida wa Kenya witwa Gachagua yaje kweguzwa ashinjwa gusugura Umukuru w’igihugu no kugira uruhare muri ibyo byose.
About The Author
